Introduccion pa creditornan
E ultimo 10 añanan na Aruba nos por mira cu e average di debe pa cas a subi drasticamente. Considerando cu esaki ta resultando den un aumento di casonan di debe problematico, Stichting Balansa Nobo a keda funda pa atende cu e tipo di problema aki. Esaki lo ta posibel pa medio di nos programa Areglo di Debe y cu cooperacion di e creditornan.
SBN ta un iniciativa di Directie Sociale Zaken y ta un proyecto piloto di 3 aña. Durante e 3 añanan, 200 caso di debe problematico lo wordo atendi y ta rekeri colaboracion di creditornan pa por logra sanea e casonan aki mirando cu e ta voluntario. Esaki ta posibel a base di un acuerdo ‘covenant’ cu nos ta sera cu creditornan di nos clientenan. E covenant lo fungi como un guia y lo forma e base pa nos programa Areglo di Debe por ta efectivo y exitoso.
Tur partidonan envolvi mester bai di acuerdo pa hasi nan maximo esfuerzo pa bin na solucionnan cu ta realistico y factibel. Algun creditornan cu ya a firma e covenant ta Aruba Bank N.V., Banco di Caribe (Aruba) N.V., Caribbean Mercantile Bank N.V., R.B.T.T. Bank, , N.V. Electriciteit-Maatschappij Aruba (ELMAR), Water- en Energiebedrijf Aruba N.V. (WEB) y Setar N.V.
E programa Areglo di Debe tin un duracion maximo di 5 aña. E intencion ta pa renegocia entre otro;
- Tur suma pendiente riba fiansanan incl. interes y boet (excl. hypoteca).
- Sumanan atrasa riba hypoteca.
- Voorschot/adelanto riba cuenta di banco.
- Atrasonan di awa y coriente.
- Atrasonan di huur.
- Tur otro sumanan pendiente of atraso riba compra di productonan of servicio.
Teniendo na cuenta cu e capacidad cu e cliente tin pa paga debe, creditornan lo haña nan pago completo of un porcion a base ‘pro rata’ di e suma total di debe cu ta coresponde nan. Esaki no ta conta pa hypoteca.
Proceso Areglo di Debe
- ‘Screening’
- Na momento cu e cliente firma e acuerdo Areglo di Debe e proceso pa colecta y confirma informacion riba e situacion di debe di e cliente ta cuminsa. Ta hopi importante pa e creditor por duna un bista exacto riba e debenan di e cliente y den un termino di tempo rasonabel pa e proceso por sigui.
- ‘Freezing period’.
- Durante e prome 90 dianan (3 luna) siguiente tur creditornan ta freeze/para tur cobransa incluyendo acumulacion di interes, boet, incasso, embargo y desconeccion di awa y coriente. Esaki ta necesario pa stabilisa y alivia e situacion financiero di e cliente. Solamente pagonan cu tin di haber cu e costonan di bida primario ta wordo hasi. Bou di costo di bida primario nos ta referi na cuminda, huur/hypotheek, awa, coriente y gas. Cobransanan cu ta atrasa ta wordo hinca den e Areglo di Debe. Tene cuenta cu SBN por desvia di e procedura dependiendo di cada situacion individual.
- Cuentanan di banco nobo
- E cliente lo habri un cuenta di banco cu ta yama ‘operating account’ y riba e cuenta aki doño di trabou di e cliente lo deposita e salario. Esaki ta un condicion di e programa y SBN lo hasi maneho di presupuesto pa e cliente. Solamente SBN lo tin aceso na e cuenta aki y lo hasi pago di debe y otro obligacionan financiero di e cliente.
- E cliente lo wordo informa den forma di bank statements, di tur transaccion hasi.
- Un cuenta separa lo wordo habri na nomber di e cliente cu yama ‘cost of living account’ y SBN lo deposita e suma calcula pa costo di bida manera cuminda, cuido hygienico, remedi y gasolin/transporte publico. E cuenta aki si e cliente lo tin aceso na dje.
- Proposicion
- Durante e periodo di 90 dia (3 luna) e negociacionnan cu creditornan ta tuma lugar. SBN lo presenta un proposicion nobo na e creditornan. A base di negociacion e creditornan por aproba of desaproba e proposicion. Si e proposicion keda aproba SBN lo notifica tur creditornan por escrito di e fecha di pago y di e sumanan cu a keda aproba.
- Pagonan
- Pa duracion di e programa (maximal 5 aña) tanten cu e acuerdo ta valido y tin placa disponibel, SBN lo ta encarga pa hasi tur pagonan di debe y otro obligacionan financiero pa e cliente. SBN lo monitor e posicion di debe di e cliente y tambe pa sigura cu e cliente no ta asumi mas debe. Por lo menos un vez pa aña SBN lo ehecuta un screening riba e entrada y gastonan di e cliente. Si SBN nota cualkier iregularidad of cu e cliente no ta cumpli cu e condicionnan di e programa, SBN lo informa tur creditornan di esaki y di e accionnan cu lo wordo tuma.
- Si entrada di e cliente cambia, un plan nobo di pago lo wordo calcula y lo presenta un proposicion nobo na e creditornan.
- Den caso cu un incidente no premedita tuma lugar den e situacion financiero di e cliente cu ta causa problema pa e cliente sigui tene su mes na e areglo existente, SBN lo aplica un ‘Interim Freezing Period’ pa stabilisa y alivia e situacion financiero di e cliente. Un proposicion nobo lo wordo presenta na e creditornan pa nan aprobacion.
- Completacion di e programa
- Ora e cliente cumpli cu e programa di maximal 5 aña exitosamente manera e acuerdo ta prescribi, e creditor(nan) ta duna dispensacion pa e restante di e debe. Esaki ta si e e la keda aproba den e areglo/proposicion cu e creditor(nan) a bai di acuerdo cu ne.
